السلام عليكم ورحمة الله وبركاته

اللهم صل وسلم على محمد وآله الطيبين الطاهرين

المفروض انزل هالتدوينة من قبل كم شهر

بس توني فاضية اكتبها

خبركم بنات العلمي ما عندهم وقت مثل بنات التجاري والادبي 2

كله دراسة وضغط حتى السنة ما صرت اقعد على النت مثل اول

عابدة الكتاب استغفر الله من كثر ما احنا مقابلينه اكثر من ربنا

وبنشوف السنة اذا ارتفع المعدل او لا

المهم بدخل في موضوع

اهو اهبل بس استحملوا شوي

ساعات لما نكون مثلاً في اجتماع او في السوق او ويه الاهل

او في المستشفى في قاعة الانتظار او نص الحصة  اوفي عز شغل مهم او قريب بنام << برا

والقلم والورقة بعيدين عنا او صوبنا بس ما نقدر نكتب

المخ يرووح بعيد ويفكر

يعني لدرجة اني اكتب شعر أو خاطرة في بالي

وعلى ما اكمل شغلي يكون كل شيء تبخر وطار

او للحين في بالي بس الكلمات اللي انتقيتها قبل احلى والحين دس ابير

او يمكن يكون نص الموضوع طلع ليه جناحين وطار مثل العفور (( العصفور ))  

فكرت مرة ومرة ومرة اني اخترع اختراع عجيب

بس يستلزم وقت وقت وقت وقت طويييييل

يمكن اموت وما اخترعه

والاهم من هذا خبرة وانا ما شاء الله عالمة غير معلمة اعرف كل شيء << اقصد العكس

يمكن بالتعاون وياكم اقدر اسويه

بس بحتاج  طاقم طبي والى مهندس الكترونيات والى ياباني (( اهم شيء )) والى طباخ

الاختراع يقول

نصنع شريحة عاد شلون تركيبها ما ادري و طبعاً بتكون بحجم صغير كلش (مرة) بحجم سماعات الاذن اللي تتركب لضعيفين السمع عشان ما يبينون وننصاد وتتركب زيهم  

ويكون بها اسلاك فيها الكترونات بالمرة دقيقة وهذا السلك نوصله بالدماغ   

طيب

وبعد ما نوصل اسلاكها بالدماغ نكمل من تركيبه ونركبه ورى الاذن (( مثل ما قلت صغير عشان ما يكون واضح ))

بمجرد ما  تجي فكرة في بالنا عساها لو وشو تنتقل الفكرة عن طريق الاسلاك الموصلة بمنطقة التكفير عبر الالكترونات على شكل كودات مثل الكمبيوتر اللي تكون من 1 و0 وتنطبع على الشريحة اللي تكون مثل الفلاش

وبعد ما تم عملية التدوين نركب الشريحة في الكمبيوتر ويطلع لنا كل شيء دوناه

حلووووة فكرتي مووو

جذي نرتاح من عناء نسيان الاشياء

وعلى طول الافكار مجمعة وما تضيع

طبعاً تحملوا تفكروا باشياء مو بزينة مني مناك  << فاهمين علي صح

تراه كل شيء يكتبه هوع

اي وعلى طاري الطباخ

عشان واحنا نخترع ناكل ههههههههههههه

التفكير يجوع

ما عليه مثل ما قلت استحملوا لانها فكرة هبلة ومجنونة

وبتاع تخريف وزهايمر هههه

وفيها خلل واجد ههههه

بس اهم شيء توسعت صدوركم على فكرتي اللي ما ادري شلون بتتطبق

ولا بعد الف سنة 

هذا الا اذا صرت اينشتاين او اديسون او فيي عرق ياباني

هههههههههههههههههههه

وحياكم ربي

سلام قولاً من رب رحيم

12 ردود لـ to “الجنون فنون”